2007:јули/август
општ конкурс

s:self tv

 

с:среќа

Набргу по твоето заминување почна да ми расте левата града. Со часови седев пред огледалото и ја набљудував: ме потсетуваше на тебе. На нашата среќа.
Докторите ми рекоа дека ова ми се случува затоа што сум јадел пилиња инјектирани со ендорфин.
 

 

н:нормално

Одејќи по улицата се разминав со дете кое изгледаше како да излегло од пожар. На втор поглед делуваше нормално.
Останав буден цела ноќ и гледав серии.

 

 

в:втори

Ме потресоа вестите дека мојата жена, некаде, во некој друг град, има втор сопруг, втори деца, втора куќа. Второ просечно семејство.
Тоа сме ние.
 

 

м:минималист

Одлучив дека треба да се наслика само една слика, со неколку генијални потези. Подоцна добивав трески колебајќи се пред моето ремек - дело.
Еден ден го продадов сликарскиот прибор.
 

 

о:одговор

Не можам да тврдам дека некој друг освен мене го посетувал господинот Павлов или дека во последно време истиот добивал закани дека ќе биде исечкан.
Тоа е мојот конечен одговор.