2007:октомври/ноември
општ
конкурс
q:queen andreena
к:колективно
распаѓање
Добредојдовте во Скопје!
Куќа на мртвите. Некрополис.
Преполно со црни врани и розови машнички.
Преполно со лоши коњаци и дреч кармини.
Преполно со заспани убавици и разбудени грдосии.
Ги навлекувам патиките, го префрлам капутот преку мене, ги закопувам очите
длабоко во лицето, и излегувам на полу-дождот. Не ми сметаат различно
издлабените лица кои ме одминуваат... ме прободуваат со фузија од мириси.
Цветни, потни, човечни и нечовечни, брзаат покрај мене, брзаат да се
закопаат себеси во свежиот гроб.
Гробарот стои со едната нога на гробот, со лопатата на рамо, со цигара
помеѓу сувите усни и распаднатите заби, и со полу-замижан поглед го
очекува сопственикот на гробот.
- Ајде бе, до кога ќе те чекам! Најдобро да одам на спиење па да луташ низ
маглата цела вечер...
И мртвиот дотрчува, гробот е отворен, тој влегува внатре и почнува весело
да цврцори со остатокот од своите мртви другарчиња. Тоа е ноќта на
неговиот (не)живот, иста како и сите други, и тој заспива во својот
обезсонет сон, со најслатката насмевка на лицето.
Кастрација на животот. Поволно. Отсекување на било каков ентузијазам и
иницијатива. Ќе ви остане едно големо мртво парченце месо, висејќи за
спомен, направено од сивило и есенски дождови.
Скопје. Хомогено соединение составено од кладилници. Америка се претвара
во огромен Старбакс? Балканот се претвара во огромна, селска, кладилница.
Преполна со избезумени луѓе, неколку зелени екрани, замајани погледи и
еден голем шалтер со мрсна тетка позади, зафатена со броењето пари. И
постојана циркулација на бес.
И вие сте исти. Дури и јас. Мртва, но незакопана. Бирам да лутам. Да не се
враќам во својот гроб. Бирам да мрчам за се' кое претставува рефлексија на
болка и празнина, замаскирана со насмевка и шарена реклама. Бирам да
сонувам. Бирам да направам избор кој не постои. Не е проблем, го
измислувам. Врз моето издлабено име на надгробната плоча небото плаче, се
распарува, лисјата паѓаат и ме чекаат, но јас не се враќам. Талкам со
засушени солзи на лицето.
Јас одбрав... одбрав да живеам. Но не сум месија. Незнам како да ве
спасам. Незнам како да воскреснам.
А ако научам, ќе талкам сама. Можеби жива, но осамена - ќе талкам низ
бескрајните гробишта, ќе го слушам цврцорењето од земјата, и сепак ништо
нема да се смени. Соништата се исти, изборите се исти.
Само времето се менува.
Најчесто врне. А тогаш уличките на градот се најубави. Светат портокалово.
Сте приметиле?